கோவை: மும்பை அணிக்கு எதிராக புச்சி பாபு லீக் போட்டியில் தமிழக லெவன் அணி முதல் நாளில் 294/5 ரன் குவித்தது. பிரதோஷ், பூபதி, இந்திரஜித் அரைசதம் விளாசினர்.
புச்சி பாபு கிரிக்கெட் தொடரை தமிழ்நாடு கிரிக்கெட் சங்கம் நடத்துகிறது. கோவையில் நடைபெறும் ‘சி’ பிரிவு லீக் ஆட்டத்தில் தமிழ்நாடு கிரிக்கெட் சங்கம் (டிஎன்சிஏ) லெவன் அணியும், மும்பை அணியும் மோதுகின்றன. டாஸ் வென்ற தமிழ்நாடு லெவன் அணி முதல் நாள் முடிவில் முதல் இன்னிங்சில் 294/5 ரன்கள் எடுத்துள்ளது. பாபா இந்திரஜித் (61), பிரதோஷ் ரஞ்சன் (65), பூபதி (63) ஆகியோர் அரைசதம் அடித்தனர்.
சேலத்தில் நடக்கும் ‘பி’ பிரிவு லீக் ஆட்டத்தில் டிஎன்சிஏ, பிரசிடென்ட்ஸ் லெவன், குஜராத் அணிகள் மோதுகின்றன. டாஸ் வென்ற குஜராத் அணி முதல் நாள் முடிவில் 321/7 ரன்கள் எடுத்துள்ளது. ஜெய்மீத் படேல் (125) அவுட்டாகாமல் இருந்தார். பிரசிடென்ட் லெவன் வீரர் சித்தார்த் 5 விக்கெட்டுகளை வீழ்த்தினார்.
திருநெல்வேலியில் நடைபெறும் ‘ஏ’ பிரிவு ஆட்டத்தில் மத்திய பிரதேசம், ஐதராபாத் அணிகள் மோதுகின்றன. மத்திய பிரதேசம் முதல் இன்னிங்சில் 207 ரன்கள் எடுத்தது. முதல் நாள் முடிவில் ஐதராபாத் அணி முதல் இன்னிங்சில் 52/0 ரன் எடுத்துள்ளது. திண்டுக்கல், நத்தத்தில் நடக்கும் ‘டி’ பிரிவு ஆட்டத்தில் பரோடா, சத்தீஸ்கர் அணிகள் மோதுகின்றன. முதல் நாள் ஆட்டம் மழையால் முன்னதாகவே முடிந்தது. பரோடா முதல் இன்னிங்சில் 255/6 ரன்கள் எடுத்தது.